September 10th 2010

September 10
Tlawngkai Ninga

A HLO MI PAWL

SIAR:
Luka 15:4-6

A hlomi ka tuu ka hmu saal ih ka lung a awi ngaingai. Curuangah lungawi in lawm uhsi! - Luka 15:6

KUMKHAT SUNG BAIBAL:
- Thufim 8-9
- 2 Korin. 3

Phunsang Tlawng ka kailai ah Colorado ramtthen ih Rocky Mountain National Park ah nauhak pawl ke ih fehnak ah hruaitu hna ka ttuan phah. Ttum khat ih ka hruaimi nauhak pawl lakah mipa nauhak pate, khulfungzet le mi dung ih netkhor theizet cu lamzin ttek pakhat ah zinsual a zawh. Riahbuk kan thlen tikah a rak um nawn lo. Thinphangzet in amah hawl dingah ka feh.

Pum hloh in a hlo ih amahte lawng tili kap ah to in khuathim hlante ah ka va tong ngah saal. Ka lungawituknak ah ka pom, ka liang parah ka thlir ih a rualpi pawl umnak tiang ka hei phur.

Scot miphun cangan thiam George MacDonald in nunau note pakhat in hramlak ah amah lawng a hlomi naute a ton thu a ngan. Naute cu a ttaang ah a pom ih a pai’ hnenah inn ah a tlunpi. Cumi nu ih a hngilh dah lo dingmi hlawknak cu, “Atu cu a hlomi pawl hawl dingah le an Pa hnenah hruaikir dingin a ratu Mi Fapa ih thinlung kha cumi nu in a theithiam zo,” tiah a ngan.

Lamzin peeng a zawhtu a faale pawl hawl ih tong ngah dingin le Pa hnenah phur hngai dingin a ratu Mi Fapa ih thinlung lo theihter hngai ka duh. “Mi Fapa cu a hlomi hawl ding le ruun dingah a ra” (Luka 19:10). Ziangtluk hlatnak ah na hlo ih ziangti’n na hlo khal asile a poi lo, Jesuh Khrih cu nangmah hawl ding le ruun dingin a ra a si. - David Roper

Jesuh cu a hlo mi hawl ding le ruun dingin a ra,
Van sunlawinak taanta in, runnak hrang man pek ding paisa loin;
A saannak a niamnak a hlatnak le a kauhnak ah a hawl,
Mi hmuahhmuah hrangah Mi Fapa cu khenbet a tuar. - Hess

Rundamnak ngah dingin, mihlo na si kha phuan awk hmaisa a ttul.